立會悲痛開工 陳維安先簽悼死難者公文

【明報專訊】由政府「跳槽」立法會做秘書長嘅陳維安（圖）正式履新後第一日返工，佢話自己第一份簽署嘅公文，係宣布立法會會喺今日悼念海難嘅死難者，感到好沉重同難過。


梁班子上任後經常受抨擊，喺換屆前轉投立法機關嘅教育局前副局長陳維安都可謂選擇明智。剛剛履新立法會秘書長嘅陳維安噚日見記者，即被連番追問曾任問責官員嘅佢可有角色衝突？佢強調自己未來處理議會工作時一定會政治中立，亦唔肯回應早前嘅反國民教育科事件，仲好禪咁講咗句﹕「放低咗嘅嘢就要放低」。


立法會前秘書長吳文華由回歸前已喺議會工作，堪稱議會事務「活字典」，唔係議會出身嘅陳維安又應唔應付得嚟呢？陳維安笑言，當初見工時已細閱《議事規則》，獲聘後亦同吳文華及其他議會秘書作更深入了解，佢認為《議事規則》唔難，反而議事慣例同埋過去嘅主席裁決就相對需要多啲時間消化。


想做到2020年見證普選

歷任立法會秘書長都係做到退休為止，陳維安就話希望能喺議會做到2020年，想見證立法會普選，屆時已達55歲嘅佢亦差唔多夠鐘退休。至於到時會唔會重返行政機關，陳維安就冇閂埋門，話目前去諗係言之尚早。佢又話未來4年會一改當副局長時嘅做法，多啲低調地喺背後做嘢，少啲喺鎂光燈前出現喎。