CY考記者時事

【明報專訊】特首梁振英喺特首選舉期間，曾經批評記者提問時大聲，令佢尷尬，噚日《蘋果日報》記者問CY點睇新界東北發展計劃，梁振英答問題嗰陣，「反問」對方知唔知對上一次影響1700戶人嘅發展係幾時，搞到記者打咗個突。


出題自己唔識答

話說噚日CY趁新聞處新居入伙，以「神秘嘉賓」身分同傳媒茶敘。CY答問題嗰陣，連考《蘋果》記者3個問題。除咗上面嗰條連CY自己都話唔識答嘅問題，佢仲問記者知唔知咩係金輪大廈事件，又問記者記唔記得1993年政府推出公屋富戶政策發生咩事。由於在場記者都冇人回答，搞到個氣氛都有啲尷尬。


查實1994年金輪大廈事件嗰時，屋宇署曾向多個天台屋居民發出封樓令，要求遷出，引嚟大批天台屋居民、大專院校學生同前線社工喺中環街頭靜坐。至於1993年政府宣布公屋富戶政策，亦曾引起交通癱瘓。


問金輪大廈事件 公屋富戶政策

講咁耐，原來CY係想引證，關於土地及房屋政策爭拗，回歸前後曾經發生，唔代表市民對政府出現「信心問題」。至於能唔能夠比較，Emily留畀讀者判斷。