陳茂波飯局議員「唔得閒」

【明報專訊】發展局長陳茂波（Paul）噚日約咗立法會議員開簡報會，簡介局方未來工作，仲約咗佢哋去附近中信大廈一間酒樓食晏。點知好多議員都唔得閒，不過，Emily就發現佢哋好多其實喺同一間酒樓嘅另一枱食飯，真係「同酒樓食飯，各自修行」！


簡報會分上下午兩場，大部分議員去咗上午嗰場，新晉議員嚟得多啲。唔少議員無食飯就走咗，留低毛孟靜、梁家傑、劉慧卿、范國威、陳健波、馬逢國同姚思榮，同埋Paul以及發展局兩名常秘等7個官員同枱食晏。


同酒樓唔同枱

不過，喺無食晏嘅議員當中，湯家驊（Ronny）同何秀蘭（Cyd）就喺同一間酒樓食飯，Ronny話助理無通知佢，Cyd就話一向同Paul好熟，唔使透過飯局同佢傾。民建聯幾個議員就約咗醫管局主席胡定旭同行政總裁梁栢賢食飯。另外，無去簡報會嘅李卓人同梁耀忠，就分別同記者以及黨友黃潤達等食飯，呢間酒樓噚日變咗「立法會議員飯堂」。