海難頭七默哀

【明報專訊】噚日係南丫島海難遇難者嘅頭七，雖然政府定下嘅3日全城哀悼日已過，但唔少市民都仍然選擇穿素色衫，經常喺鎂光燈前亮相嘅官員、議員更不在話下。不過，工聯會勞工界「新丁」議員郭偉強噚日就穿上shocking pink嘅Polo恤出席「精神健康月」啟動禮，完全係「一枝獨秀」，搶鏡到不得了。


特設默哀環節 官員多穿素色

「精神健康月」啟動禮嘅主辦單位包括勞福局噚日喺活動開始前特別加設默哀環節，向遇難者致哀，負責主禮嘅政務司長林鄭月娥、公務員事務局長鄧國威同勞工及福利局長張建宗都一身素色衣服，其中張建宗更係由頭黑到落腳，睇到都戥佢有少少熱。


於是穿上粉紅色衫嘅郭偉強就喺一眾黑衣白衣人當中好搶鏡喇，引起傳媒注意。佢解釋話，選擇以粉紅裝束示人，係想響應活動主題，帶啲正能量畀市民，又話估唔到活動會加插默哀環節。佢經記者提點後，大合照時亦刻意企開啲，以免尷尬。


話為帶正能量畀市民

講番個活動，其實政府早喺1995年起，聯同多個非政府機構同公共機構，喺每年10月舉辦「精神健康月」，提高市民對精神健康嘅關注同認知，噚日有幾百人響應團體呼籲，由維園遊行至灣仔，宣揚精神健康嘅信息。