志峰護住之鋒 驅逐粗口阿叔

【明報專訊】學民思潮召集人黃之鋒（Joshua）噚日喺維園出席港台《城市論壇》，再成為維園阿伯圍攻對象，啲阿伯拎住自製嘅手寫標語牌，大鬧Joshua係漢奸、走狗，仲喺節目直播時不停大嗌，其中一個阿叔仲不停用粗口鬧Joshua，說話都幾難聽，最後被逐離場。


阿叔圍攻拎牌罵漢奸

噚日《城市論壇》題目，係討論有市民喺國慶日升旗禮被逐離場事件，所以Joshua出席。作為主持人嘅謝志峰，都要保護出席嘉賓，佢勸咗粗口阿叔好多次，但阿叔唔肯收口，仲愈鬧愈起勁，謝志峰於是出「紅牌」叫保安員驅逐呢個火爆阿叔離場。謝志峰話，多次勸喻無效，佢先至決定請阿叔離開。


Emily就覺得，大家議事論事，點可以咁樣侮辱人㗎，Joshua喺節目結束之後就話，希望大家就算觀點、立場唔同，都能夠理性討論，是其是、非其非，唔好以唔理性嘅方式互相指罵。