美酒佳餚展西九絕唱

【明報專訊】一年一度嘅美酒佳餚巡禮又嚟啦，今年係最後一年喺西九龍海濱長廊舉行，旅發局主席田北俊話，初步同政府傾過，明年或會移師新政府總部對外空地，但田少就話，望向九龍嘅景，始終不及望向港島咁靚，有機會都希望可以重返西九文化區舉行咁話。


攤位由287增至311個

話說去到第4屆嘅美酒佳餚巡禮，將喺11月1至4號舉行，攤位由上年287個增至311個，仲首度增設「甜品天地」，設有10個甜品攤位同6個美酒攤位，入場人士可以試吓以中西糕點搭配美酒，Emily就有興趣試吓用3式朱古力火鍋忌廉泡芙，配番杯甜酒或者汽水酒。


至於美酒環節，今年至少有15個品牌係首次參展，部分來自羅馬尼亞同烏克蘭等地，亦有獲得公平貿易認證嘅釀酒品牌會帶5款美酒參展。


生肖酒限量3000支 未有龍年酒

另外，有本地釀酒師喺2009年開始，以12生肖為題，每年出產3000支酒，由於釀製需時，所以今次帶嚟參展嘅係「牛年」紅酒同「虎年」玫瑰酒，想飲「龍酒」嘅朋友，就要等多兩年。


美酒佳餚巡禮係免費入場，不過，若要品嘗美酒或甜品，就要買「品酒證」或俾20蚊買「甜品賞味券」。


今年首次推出限量4000套「二人行標準品酒證」，各款品酒證聽日開始網上預訂。旅發局今年引入用者自付原則，入場嘗美酒者要自備或購買酒杯，一係要畀5蚊買隻膠杯。