張華峯做議員 賺錢多過做老闆

【明報專訊】新一屆立法會就快開波，小琴同「新鮮出爐」嘅立法會金融服務界議員張華峯食飯時，講開佢份新工，佢就苦笑話今次「轉行」，人工高過佢做證券行老闆！無他，港股呢排叫有少少起色，但整體來講都係生意淡薄，加上證券行佣金嘅惡性競爭，張華峯即使做老闆，出份糧少過立法會議員大約8萬幾蚊嘅人工，真係一啲都唔出奇。


座位近官員 憂容易「中蕉」

當然，張華峯唔係因為份糧先「轉行」啦。佢已經有滿腹大計，要喺立法會上提議案。問佢係咪會急選民之急，搞搞個佣金二級制先？張華峯就話，呢樣嘢阻力一定好大，反而延長返中午休市個食飯時間，佢覺得食糊機會大啲，好大可能成為佢嘅頭炮。


張華峯會坐喺立法會啲第一排，小琴笑佢會好容易「中蕉」，被佢啲立法會同事掟中，張華峯都有啲擔心，一來佢個位就喺啲官坐位附近，的確好易誤中副車，而且開會時冇可能成日向後望，難以防範，唯有平時練下身手提升反應。