立會議員申報利益

【明報專訊】做議員，除咗薪高糧準，仲不時有機會四圍走，筍過去建制派搞嘅荔枝團。好似民建聯嘅黃定光（象哥），喺2008到2011年間，3次接受國泰贊助食宿機票，去美國同意大利參觀同慶祝新航班服務；但08年5月嗰次，因為同其他議員飛咗去，令到食物營養標籤法修訂案唔夠票通過。


象哥有贊助四圍飛

國泰經常邀請立法會議員外遊，08年嗰次就係去美國西雅圖參觀波音飛機工廠，10年同11年就慶祝意大利米蘭同美國芝加哥新航班服務，象哥喺米蘭嗰次仲帶埋太太去。不過，象哥算誠實，食完茶禮都有向立法會申報。


新一屆立法會議員近日陸續向秘書處申報個人利益，Emily發現，人民力量陳偉業（大嚿）身體力行開咗「人民公社」。讀者唔好誤會，佢唔係搞共產主義，人民公社原來係網上食品雜貨店，仲會分紅畀買家