林大輝嚇到曾鈺成大叫

【明報專訊】立法會噚日舉行選主席嘅特別論壇，唔少議員都針對未來主席主持會議嘅做法提問，當然亦有例外，好似林大輝咁，佢引用民建聯曾鈺成早前談論特首梁振英嘅說話，曾鈺成係話CY從政路與中央關係密切，令人覺得做事都會企喺中央一邊，擔心會赤化香港，佢就認為其實曾鈺成同梁振英呢方面不遑多讓，同樣「黨性強」，唔知會否影響立法會嘅中立。呢番話若係出自梁家傑，大家唔會覺得奇怪，但由林大輝講出嚟，大家都會心微笑。


曾鈺成話，呢個「包袱」幾年前已經有人提，有人質疑佢或者會為咗中立而矯枉過正，佢話過去4年做立法會主席嘅表現有否失去公正，大家可以評價。


話曾同佢欠溝通

除咗質疑曾鈺成，林大輝話公民黨梁家傑選主席只係做騷，完全無向佢拉票，所以一定唔會支持梁；曾鈺成雖然有拉票，但就講一套做一套，話曾過去4年都無同佢緊密溝通咁話，講到唔會投票畀曾鈺成咁，嚇得曾生大叫，話大輝明明應承係鐵票。不過，大輝笑住咁答，「鐵票」呢個係說話藝術，個個搵佢，都一定會話支持，仲話投票係暗票咁話。