新聞類別
財經
詳情#
【明報專訊】好多80後埋怨樓價太高上唔到車，上一輩嘅人就話，係班80後唔識理財，唔怪得其他人。摩根資產管理就有調查發現，80後普遍想在33歲或之前做百萬富翁，55歲退休，不過有一半受訪80後每月儲錢唔夠5000蚊，摩根就話咁儲法，儲10年都畀唔到首期喎。
摩根資產管理董事總經理潘新江計咗條數，假設你平平地買層新界樓，300萬元，首期畀三成，就要90萬元，如果每個月只儲5000，儲10年都係得60萬。講咁耐，都係想話，要有錢買樓同退休，就要投資啦。佢話如果投資有8％回報，錢滾錢之下，唔使10年就買到樓。
投資回報難有8% 慳錢亦重要
不過，小琴睇番摩根士丹利嘅MSCI世界指數，過往20年平均回報率得6.8％，要搵8％回報，談何容易呢？不過小琴都同意潘新江所講，後生仔買少部智能電話，或者去少一次日本旅行，都儲到唔少錢啦。
不過，個調查本身都有一些值得商榷之處，例如摩根無披露受訪者嘅薪金水平。另外，調查說超過一成嘅80後係「月光族」甚至「用突族」，即係掙幾多使幾多，甚至支出多過收入。但小琴覺得，人地可能係孝順仔，大部分人工用嚟畀家用，又可能放工走去進修，增值自己，但報告一律標籤佢地「無儲蓄習慣」。
email:piano@mingpao.com
回應 (0)
