張宇人收30萬捐款

【明報專訊】立法會選舉儼如燒錢遊戲，直選議員固然要最多彈藥，但原來自動當選嘅議員同樣有「吸金能力」，根據立法會議員個人利益申報，自動當選連任飲食界議員嘅自由黨張宇人獲得嘅選舉捐獻，比直選議員仲要多。


張宇人得到51名飲食界老友合共贊助逾30萬蚊，包括板前壽司嘅「Ricky San」鄭威濤、「阿一鮑魚」楊貫一、 新光酒樓，以及同樣有捐錢畀民主黨嘅蘭桂坊之父盛智文。唔通呢班捐款者預知業界未來4年都係由Tommy領軍，因而決定捐錢？


至於畀人揶揄為「西環契女」嘅梁美芬，分別獲陳頴、程燕同劉金杯3人合共捐出55萬蚊。梁美芬只肯講佢哋係「識咗好多年嘅企業家」，冇任何政治背景咁話。


「無背景企業家」贊助梁美芬

民建聯蔣麗芸早前畀本報揭發佢係立會新丁樓王，仲不時有買賣，但佢喺申報表上只係簡單交代喺「香港同內地有多個物業」。


本身係律師嘅謝偉俊先至勁，世界各地有多達25個物業，當中有6個喺美國賭城拉斯維加斯。