新議員預告誓辭加料

【明報專訊】說時遲那時快，抖咗三個月暑嘅立法會今日復會，70個議員將會宣誓，即場選出立法會大會、內會同財會嘅正副主席。今年泛民激進勢力冒起，有人話議員宣誓點會再係照稿讀，人民力量同新民主同盟嘅議員噚日就預告，今日會喺誓辭加料玩吓，睇嚟今日係好戲連場。


范國威：末段加自己政綱

首次晉身立法會嘅范國威（Gary）話，計劃喺誓辭末段加插「制定港人優先政策，捍衛香港核心價值。民生無小事，民主要堅持」字句。Gary話，呢啲都係佢嘅競選政綱之一，加埋入誓辭，可顯示佢嘅決心喎。


唔想讀語句會特別細聲

人民力量「慢必」陳志全就話，人力3個議員都會喺誓辭加料，但係加乜，就要保持神秘感；佢哋面對最唔想讀嘅語句時，亦會讀得特別細聲，一般相信可能會係「效忠中華人民共和國香港特別行政區」呢幾粒字。


社民連梁國雄可以話係開創「誓辭加料」嘅先河，預計佢今日會有「驚喜」帶畀大家。