黃百鳴公司未上市 先付4800萬片酬畀1明星

【明報專訊】黃百鳴間天馬娛樂（8039）搞上市，算係近年少有嘅娛樂圈踩入股市事件。雖然玩配售，小琴無份抽，但都想知道近年香港影壇，喺外語片「入侵」下，天馬有咩「把炮」搞上市。截至2012年6月30日個財政年度，公司收入有1.37億元，全年賺2098.1萬元，按年升19.3%，表現算係唔錯。


之但係，2010年6月同1個演員簽咗6年約，一共要拍9部戲，天馬仲要預付4800萬元片酬。好簡單咁諗，1年收入得1億幾，但係1個演員片酬已經係佔收入超過35%，都真係幾誇下。今次配售4億股，每手4000股，每股定價介乎0.8元至1元，最多集資4億。招股書入面寫到明，演員成本佔比近幾年起碼40%以上，所以4億入面有成6000萬元，係用嚟做製作費。2012年歷史市盈率係19.1倍，抵唔抵真係見仁見智。