樹根區會主席位自己友吼實

【明報專訊】民建聯鍾樹根成功「升呢」做立法會議員，佢早前講過，如果工作太忙，唔排除辭去東區區議會主席一職，以免兩邊兼顧唔嚟。雖然佢只係講過吓，亦無話一定辭去，但原來已經引嚟唔少東區資深區議員吼住個位喇，不過Emily聽聞，有意「替補」鍾樹根嘅其實都係民建聯成員，有人笑言東區係「解放區」，民建聯、工聯會佔大多數，其他人想做都無say啦。


升呢不排除辭任3人有興趣

Emily聽聞，家喺東區做緊副主席嘅黃建彬、已經兩屆自動當選嘅周潔冰，以及另一個資深議員龔栢祥，都有意爭奪區議會主席，一副隨時準備好「接棒」嘅狀態，而3人都係民記成員，所以即使樹根真係辭職，東區都係民建聯天下。不過，立法會一直都有人身兼區會主席，或者樹根都覺得自己可以勝任，做足4年主席又點話。