新聞類別
財經
詳情#
【明報專訊】小琴前日先同大家講過，香港「80後」年輕人好多都想早日成為百萬富豪，但喺儲錢方面就行動嘛嘛，一唔小心就變「月光族」。港大噚日公布嘅一個調查結果又令小琴開咗眼界，今次受訪嘅兩百幾名80後之中，竟然有75%曾經喺欠緊銀行卡數嘅同時仍然捨得大手使錢，「獎勵」自己買新手機、嘆美食甚至四圍旅行嘅年輕人為數不少（見表）。連在場公布結果嘅大學講師都忍唔住感歎，對於呢種樂觀積極嘅消費心理，「唔係好明」囉。
四成人擔心卡數滾大 影響買樓結婚
小琴因為記性頗差，平日都好少同人借錢，因為驚第日唔記得還而「爆煲」，對信用卡呢家嘢更加心存恐懼，一直都唔敢申請。睇翻今次個調查結果，呢群80後受訪者之中，竟然淨係得25%嘅人會喺欠銀行卡數時期限制自己嘅高消費，剩低嘅七成半之中，唔少仲會有心機買靚靚新手機（41%）、豪飲豪食（39%）甚至出門旅行（31%），睇來，小琴在80後年輕人行列之中，算得上非常保守。
不過，受訪80後之中，其實分別有46%同埋38%嘅會擔心，卡數滾大會影響未來買樓同埋結婚大計。
安信：勿當信用卡是ATM
小琴就諗，既然知道咁大鑊，就不如改吓借錢大使嘅壞習慣啦。幫手搞今次調查嘅安信信貸市場部主管周美華都話，自己公司現時批出嘅貸款之中，有六成都係借畀客戶還卡數，仲提醒各位，唔好將信用卡睇作ATM，碌完條數就應該快快手還喔。
email:piano@mingpao.com
回應 (0)
