內地客迫爆歐美名店

【明報專訊】內地黃金周消費跌得慘不忍睹，歐美零售業卻迎來狂歡。中國銀聯啱啱公布，黃金周8日銀聯卡海外交易額按年增長33巴仙。除咗歐美傳統購物聖地，黎巴嫩、約旦等一啲中東國家銀聯交易額更加有幾倍增長。內地網民就揶揄，話中國人大有買下全世界、打救歐洲經濟嘅豪氣。


豪客租護照巴黎掃CHANEL

有預測講，今年中國遊客出境遊花費大概有800億美元，按年增長16巴仙。由於中國購買力太過瘋狂，早喺兩、三年前，法國LV店就開始對中國人限購，一本護照只能買一件或者兩件貨品，唔少奢侈品牌都仿效。但呢招完全阻止唔到中國富豪掃貨。


新華社噚日就話，響巴黎香榭麗舍大道上，有中國人為咗買多一隻CHANEL手袋，拉住喺當地留學嘅中國學生，話用10歐元租用佢嘅護照。睇嚟內地人消費能力仍然勁強，點樣將佢哋留番家鄉就好重要。