民主黨瘦身 工聯要請人

【明報專訊】立法會選舉早就告一段落，家連宣誓都做埋，「後遺症」開始陸續浮面，Emily聽聞，選舉失利嘅民主黨，唔單止早前被迫解僱3個負責立法會政策研究及行政工作嘅職員，近日黨總部亦都瘦身，向4名職員送上大信封。


民主黨總部炒4人

民主黨嘅立法會議席由8個減至6個，資源有所減少，為咗開源節流，該黨迫不得已辭退4名喺太子總部返工嘅同事，部分人就轉介咗去教協工作。Emily聽講，民主黨內部覺得，喺呢個時勢下，有必要成立籌款委員會，由有「政治魅力」嘅議員出掌，希望跑到筆數番嚟，協助民主黨長遠發展。有黨內人士直言，喺太子茶餐廳請個洗碗女工都要過萬蚊，最希望就係用籌到嘅錢，投放喺黨內嘅後生仔身上，希望留到佢哋，亦可以對得佢哋住。


工聯6議員請助理

另邊廂，有議席進帳嘅工聯會，6名議員就登報紙請議員助理。工聯會無講議助人工幾高，但請人嘅要求就絕對唔低，應徵者除咗要大專畢業、精通中英文、對議會及研究工作有興趣，仲要通過筆試同面試兩關先獲取用。