兩地打水貨客有暗號

【明報專訊】水貨客問題日趨嚴重，各個執法部門近月加強打擊，噚日海關、入境處同警方嘅代表出席北區區議會，交代近日討論打擊水貨客嘅情况。北區區議員劉國勳話，海關官員用咗好多名詞講述今次行動，例如「共築國門之盾」，原來係講本港同內地執法部門合作打擊水客問題；「飄移」就係講水貨客近日改變方式運水貨，例如叫學生去運手提電話等。


海關共拘310人

呢啲字眼聽到Emily一頭霧水，難怪劉國勳都笑言呢啲字眼好深奧。海關仲喺會上話，過去一共拘捕咗310人，重申如果涉及2萬蚊以下嘅水貨，會打稅或退還貨品，如果係超過5萬蚊，就已經可以刑事檢控。


警務處長曾偉雄噚日亦有出席會議，劉國勳雖然來自民建聯，但都向一哥爭取新聞自由，佢喺會上提到，現時政治生態轉變，覺得警察程序守則未必再適用，建議警方加強前線警員培訓，亦要平衡公眾秩序、政府透明度同公眾知情權。曾偉雄話，目前已經一直改善同檢討記者採訪安排。