龐一鳴怨胡志偉單車遊「約得太急」

【明報專訊】早前話買多部單車慶祝當選嘅民主黨立法會議員胡志偉（前），坐言起行，噚日跟朋友一齊踩單車遊九龍東，話要推動單車代步。呢項活動其實係回應環保分子龐一鳴嘅「砌車」挑戰，因為龐一鳴日前質疑胡志偉推動環保嘅誠意，撩胡志偉周三去踩車，但胡氏反約龐一鳴噚日去九東單車遊。


胡志偉噚日下晝兩點同車友喺鑽石山出發，一路踩去鯉魚門再折返，開頭有警車跟隨，但胡志偉同差人講，佢哋幾個人只係平常踩吓車，唔使保護，所以警車之後都走咗。龐一鳴就抱怨胡志偉約得好急，所以唔可以應約，而下晝約5點就有人發現龐一鳴喺大圍出現。


兩個男人暫未能以車會友，但同時話約緊，願意坐低傾環保講低碳。胡志偉就話一直想推動政府喺馬路設單車線，所以都好想見吓龐一鳴，認識多個朋友咁話。


（鄧宗弘攝）