卿姐：無興趣做黨主席

【明報專訊】何俊仁上月辭咗民主黨主席之後，由劉慧卿暫時出任代主席，留待12月換屆時選出新一屆黨主席。卿姐噚日同傳媒茶敘時就講明，自己無興趣、亦無能力做主席。至於盛傳會做下屆主席嘅黃碧雲係咪適合人選，卿姐就話唔想評論，費事被人批評佢欽點主席。


拒評黃碧雲是否合適

卿姐又話，會去信資訊科技及廣播事務委員會，要求跟進數碼廣播公司停播風波，調查中聯辦有無干預，令到電台停播咁話。另外，立法會主席曾鈺成早前話黃毓民寫信畀佢要求再宣誓，但毓民就話從無主動去信主席。卿姐話呢件事搞到佢好混亂，肯定有人唔老實，佢噚日打電話畀立法會秘書長陳維安，提議秘書處交代清楚。卿姐仲透露，佢會代表民主黨加入立法會行政管理委員會，監察立法會秘書處嘅運作。


卿姐上個月喺瑞士日內瓦被搶手袋，佢噚日憶述呢場「遇賊記」，話佢同個賊拉扯手袋足足30秒，結果都被人搶走咗，好彩有途人幫手追賊先至力保不失。 卿姐話，日內瓦治安麻麻，但當地警方效率好高，錄口供只用咗10分鐘，如果喺香港嘅話，肯定要搞大半日，佢認為香港警方應該向人哋好好學習。