春秋航空1毫飛日本

【明報專訊】唔使1蚊可以直飛日本，小琴一啲都冇講笑，內地廉價航空公司春秋航空從聽日開始，會響上海飛日本九州佐賀縣嘅航線推出單程1円機票，兌番港幣只係1毫子，回程亦有1円機票，咁平嘅機票每個航班會有50張，活動仲會搞足兩個月，雖然票價唔包內地燃油費同機場使用費，不過計落點都超值。


點解要送大禮？原來都係同中日關係有關，據了解，今年8月春秋航空呢條航線平均載客率達到82%，但係釣魚島事件之後，9月份載客率跌到得63%，所以公司唯有同佐賀縣政府合作，透過超平機票去刺激番載客率，吸引更多中國遊客到佐賀觀光。


其實家中日關係仲未明朗，衝突更有愈演愈烈嘅趨勢，日本車響內地嘅銷售已經大受影響，就連啲飛日本嘅航線都冇人坐，睇嚟再唔快啲解決，中日兩國企業都真係會好頭痕。