新民黨搶閘提百施政建議

【明報專訊】《施政報告》原定今日公布，但特首梁振英（CY）一早話咗押後到出年1月先公布，所以施政報告諮詢期至今仲未展開。不過，新民黨葉劉淑儀同田北辰就急不及待，噚日率先搶閘，向特首辦提交102項施政建議，似乎怕「執輸行頭，慘過敗家」咁喎。


拒加入「叫政府花錢」潮流

葉太話，因為CY今日會到立法會講佢嘅施政理念，所以佢同田二少噚日就向特首辦提交建議。不過，102項建議都唔少，CY得一晚時間睇，恐怕未必消化得切噃。


Emily翻看新民黨12頁嘅建議書，發現部分建議比較空泛，例如「促請政府全力支持中小企」、「尋找金融新機遇」等。當然亦都有唔少比較具體嘅建議，例如建議所有小一學生都由外籍教師教英語，小朋友可以從小學好英文。新民黨又話堅拒加入「只懂叫政府花錢」嘅潮流，家全球經濟前景唔明朗，希望政府審慎理財，全面評估已經或者將會推出嘅民生措施對長遠財政嘅影響。