除夕倒數移師會展

【明報專訊】2012年仲有唔夠兩個月就結束，如果世界末日嘅傳說無出現，大家就要準備迎接新一年喇！對上5年大家都係望住港島最高嘅IFC（國際金融中心二期）倒數，但今次同以前唔一樣，向維港海面望過去就可以倒數！事關今年倒數以會展做軸心，先喺維港放煙火，慢慢伸延到港島幾座主要建築物，用盡全條港島海岸線。


用盡港島海岸線

旅發局主席田北俊話，雖然會展無IFC咁高，但吸引力唔輸蝕。總幹事劉鎮漢話，以前喺IFC倒數，大家只會望住呢座超級摩天大廈；喺會展倒數，同對面海尖沙嘴更接近，仲可以睇晒全個維港。


今年旅發局搵咗新世界集團贊助，預計要用1,200萬蚊，旅發局最多出600萬，其餘就由新世界同其他贊助商畀。2007至2010年嘅倒數活動，一直係新鴻基同恒基出錢，但舊年兩間公司決定唔贊助，旅發局要臨時搵政府同馬會包底。旅發局話，當時有人擔心今年要取消維港倒數，所以喺匯演細節都未落實之前，佢哋就搵咗新世界搞簽約儀式，等大家安心。至於詳細匯演安排，旅發局仲傾緊，應該要到12月公布。