思捷勒緊肚皮搞改革

【明報專訊】思捷（0330）幾日前公布咗11/12財年年報，同上個月個業績發布會一樣，份年報裏面有好多圖片展示公司嘅新產品、大改革，仲色彩繽紛咗好多，第一印象真係會覺得思捷活力返晒嚟。但原來眼淚藏在細節中，仔細啲睇吓過去一年思捷嘅人手同薪酬變化，就會發現公司上下原來係勒緊肚皮搞改革，真係有苦自己知。


話說前行政總裁范德施搞轉型大計第一年，就手起刀落削走成個北美業務，到底有幾多人因此失業無從得知，但年報話截至今年6月底，全球僱員有12,400人，而舊年同期就有14,100人，換句話講，即係一年內員工減少咗成1700人，削減幅度超過一成咁多﹗人少咗，公司嘅人工成本即刻慳番一億有多，呢個轉型大計仲要搞多3年，唔知會唔會有更多員工失業呢？

全球裁員1700人

不過啲管理層都一齊節衣縮食，年報顯示，雖然其他主要管理人員大致上冇咩重大工資調整（見表），但提倡4年轉型計劃嘅主腦范德施身先士卒，全年工資縮水6.6%，係咁多個高層當中減薪最多。而去年度仲未接手主席一職嘅柯清輝，人工加咗7.5萬蚊，去到一年80萬。對比之前一年嘅年報，佢多咗個薪酬委員會主席嘅職責，唔知喺咪呢個原因加咗少少人工。


不過柯生做咗主席後，人工就會增加差唔多成一半，一年會有152萬，而范德施雖然上個月正式離職，但薪金經檢討後，都有得加番1.5%。


email:piano@mingpao.com