癡漢恐嚇袁彌明報警

【明報專訊】港姐出身嘅「人民力量」成員袁彌明（Erica）一向有唔少宅男粉絲，但日前佢因為畀一個「癡漢」騷擾兼恐嚇而報警求助。話說有個男子月前喺獨立媒體發表一連5篇名為《本人與袁彌明的一些關係》文章，大談如何被Erica傾倒，仲透露曾去Erica屋企送花，換來Erica一句「你黐線㗎」。Erica話，前日喺反國教集會見到呢名男子，被對方辱罵。


指男子跟蹤嗌強姦

Erica話，前日反國教集會後揸開篷車離開時，呢個男子坐喺一架的士上，突然攪低車窗，大嗌話要強姦佢同埋要佢死，嚇到佢要加速至甩得身。佢話呢個男子喺競選期間已經成日跟住佢，佢一直都容忍，但覺得今次對方咁做已經構成恐嚇，於是喺人民力量嘅男丁陪同下到警署報案。


不過，呢個男子事後喺網上發表《不稀罕的愛》講出另一版本，聲稱當晚係Erica故意開車爬佢架的士頭，佢先至叫的士司機跟住Erica架車，再趁機鬧佢兩次。佢仲話Erica唔應該用佢嘅情感做實驗，「這樣的愛、本人不稀罕」。


Erica話，由於自己一個人住，家出入唔多唔少都有啲驚，盡量都搵朋友陪。佢話，當初參選立會，選舉事務處要求佢提供住址時，佢已心知會出事，無奈畀呢個男子透過憲報取得佢嘅地址。佢認為，選舉事務處要候選人提交住址係無可厚非，但真係冇必要將資料公諸於世咁話。


選舉事務處就回應話，選舉主任係根據《選舉管理委員會（選舉程序）（立法會）規例》，喺公告上刊登候選人嘅主要住址，但就冇回應會唔會檢討呢個規定。