舊立會大樓翻新

【明報專訊】自從立法會上年搬咗去金鐘，中環昃臣道舊大樓就變得冷清，閒置超過半年，Emily同埋行家經過，見舊大樓重門深鎖，勾起唔少以前喺立法會裏面開會嘅熱鬧情景。政府噚日終於宣布，招標翻新舊大樓，將佢改為終審法院，不過，工程最快都要2014年11月先至完工，Emily希望到時有機會再去舊大樓採訪啦！


改為終院 料2014完工

舊大樓總建築樓面面積約7940平方米，合約工程範圍包括為舊大樓結構修改、歷史建築保存修復，仲有渠務同外部工程，下月30日中午截標，下年5月開始施工，2014年11月要完工。


設展覽廊了解歷史

其實，舊大樓以前係最高法院，1985年改為立法局。大樓1984年已列做法定古蹟，今年啱啱好係啟用100周年。司法機構之前話，1樓會議廳會改為大法庭，又會拆咗公眾席，重現最高法院時代嘅拱門。至於以往連接囚犯接收室同1樓法庭嘅地下室內高架橋，即係俗稱「奈何橋」，以及犯人入口、兩間囚室同拱門都會復修。舊大樓仲會開設展覽廊，令公眾了解司法機構同大樓嘅建築歷史發展。