樹根做港大校董

【明報專訊】當上立法會議員，坐擁議席之餘更可搖身一變成為大學校董，根據法例，立法會須選出議員出任大學校董，過去作風較草根嘅民建聯鍾樹根，成功「升呢」出任港大校董。消息一出，即時引起校友關注，唔少人都話有啲九唔搭八咁講。


未成學士跳讀碩士

翻查資料，鍾樹根70年代讀完中學，到2002年完成港大專業進修學院同暨南大學合辦嘅文憑班，仲未取得學士學位。不過，去到2004年，佢突然跳級獲「英國蘇格蘭格拉斯哥卡利多尼安大學」取錄，攻讀工商管理碩士。


港大除咗多咗樹根做校董，建制派謝偉俊同石禮謙、民主黨涂謹申同獨立葉建源都有份做。博士學歷曾受質疑嘅民建聯葛珮帆就做咗中大校董，另外兩個係自由黨張宇人同范國威。


另外，立法會3個常設委員會亦互選主席，最受關注嘅議事規則委員會就由民建聯譚耀宗連任主席，公民黨梁家傑做副主席。議員個人利益監察委員會，分別由民建聯葉國謙同民主黨劉慧卿做正、副主席。政府帳目委員會主席職位就被建制派包攬，分別由石禮謙同謝偉俊出任正、副主席，會計界梁繼昌未能搶位。