葉建源轉做教協義工

【明報專訊】立法會教育界議員葉建源本來係教協嘅受薪總幹事（發展），但入咗立法會後要做議會工作，佢又有每月8萬元嘅議員薪金，所以喺教協份「受薪」工作，已經變咗「義務」職位唔收錢。不過，教協會務工作繁重，佢哋都登咗廣告請總幹事，據聞已經有唔少有識之士申請。


登廣告請總幹事 要求10年經驗

葉建源同Emily講，教協並非因為佢入咗立法會所以請人頂替。佢話教協今年起已設兩名總幹事，一個由佢做，主理教育政策同研究發展，另一個總幹事集中管理會務，包括管理人事行政、打理超級市場等會員福利工作。不過另一名總幹事、服務教協逾30年嘅何小玲今年6月突然去世，所以要請番一人填補空缺。


葉建源話，現時要議會同埋教協兩邊兼顧，而教協又少咗一個總幹事，所以教協都好想快啲請番人。教協已經喺報章登咗招聘廣告，要求應徵者有10年相關嘅非政府組織（NGO）工作經驗。葉建源話申請人有無教育經驗無所謂，但當然有就更好，最好申請人係認同教協嘅理念，包括支持民主同人權理念。至於薪金就無預設乜嘢水平，視乎申請人資歷。


另外，葉建源上任立法會唔夠一個月已經話辛苦，早前有國民教育風波，家要處理中學縮班殺校問題，佢又係議會新丁，無加入政黨，所以好多議會事務同政府政策都要由零學起。於是教協嘅工作時間難免分薄咗，而佢都好識做，無收兩家「茶禮」，今個月起轉做義務總幹事。而佢好樂意幫教協做義工，佢未做總幹事前，已經喺教協做義工。