馬逢國叫立會遷就人大

【明報專訊】前港區人大代表團長吳康民早前喺《明報》撰文，呼籲立法會議員唔好競逐人代，話佢哋兩邊難兼顧。身兼人大代表嘅體育、演藝、文化及出版界議員馬逢國，噚日不但同康民叔唱反調，仲話立法會應該喺3月休會，遷就佢哋上北京開人大會議！


康民叔早前話，身兼人代嘅立法會議員，每年3月兩會喺北京舉行嗰陣，都要缺席立會，佢認為議員「不應貪圖榮譽職位」，唔好去選人代。但馬逢國就話，其實人大傾嘅係全國事務，唔少議員都好關心，所以應係立會休會，遷就人大開會，佢亦唔覺得兩者有矛盾。佢又話，人大係全國嘅諮詢同權力機構，而立法會就係地方權力機關，若由議員做人代，會令人大更有「代表性」。


馬逢國話，其實佢仲諗緊年尾或出年初嘅人大選舉去唔去馬，因為處理立法會事務已花咗佢好多時間。佢最近考慮辭去兩項公職，包括創意香港嘅創意智優計劃審核委員會副主席，同埋康復諮詢委員會委員，話怕立會忙起上嚟，會拖慢兩個委員會開會進度。