袁彌明避癡漢甩底商場騷

【明報專訊】人民力量成員袁彌明（Erica）早前因為被癡漢粉絲騷擾而報警，點知原來事件唔單止影響佢日常生活，更影響埋工作。Erica本來答應nowTV嘅觀星台，噚日到荃灣一個廣場出席公開活動，最後都係擔心被人「追擊」，結果都無去到。


去唔到同志遊行撐慢必

Erica話，家每日都提心吊膽，出街都擔心嗰個男子喺後門等佢，所以唯有預先喺facebook預告自己唔去nowTV嘅活動。佢話，本來諗住改去同樣喺噚日下晝舉行嘅同志遊行記招，撐黨友「慢必」陳志全，但有人就向佢通風報信，話見到嗰個男子改變行程喺嗰度等佢，叫佢千祈唔好現身。Erica慨嘆，睇怕短期內都唔會出席公開活動，睇嚟最傷心嘅都係Erica嘅宅男粉絲喇。