蔣麗芸：繼續做自己

【明報專訊】民建聯劉江華喺選舉墮馬後，唔少人都估緊邊個會繼承佢「重炮手」嘅角色，經過過去一個星期，相信唔少網民睇完蔣麗芸（Ann）嘅兩場「激昂演出」後，都會對佢「刮目相看」，認為佢當之無愧。面對網民話佢發言有如「潑婦罵街」嘅批評，阿Ann就話自己只係「be myself」（做自己），冇諗過要改喎。


考慮收細音量

阿Ann喺上星期大會上激動咁力保教育局長吳克儉，高聲疾呼﹕「佢做錯咗啲乜呀？使唔使炒咗佢呀？」後來又喺財會上逐個泛民指住嚟鬧，短片喺短短一星期點擊率已衝破10萬關口。阿Ann噚日話，其實事前佢有諗過應唔應該「丁字腳」斯斯文文咁發言，但後來因為唔想違背良心而決定「做自己」，「呢個就係我，我係一個有表情嘅人，我對一啲路見不平嘅事會跳起身。如果見到條馬路有紙皮箱，我係會停咗架車執㗎！」


作風豪邁嘅阿Ann又話，話之條片有幾多點擊率，都冇人可以阻止佢做自己，但就笑言會考慮將音量收細少少，「可能之前（選舉）慣咗大聲嗌咪！」