渣馬未跑先鬥電腦

【明報專訊】一年一度嘅渣打馬拉松向來係港人注目嘅體壇盛事之一，幾萬人天未光就齊齊上街一展身手。「渣打馬拉松2013」喺出年2月24號舉行，健兒呢一刻未鬥體能，但先要鬥部電腦夠唔夠快。


剩小量郵遞名額

前日接受網上報名嘅全馬拉松同埋半馬拉松賽事，報名名額兩日內閃電爆滿，只係剩番少少郵遞名額，睇怕唔使幾耐都會無晒。主辦單位業餘田徑總會話，舊年要9日先至完成報名，今年只係用咗兩日就額滿，佢哋都話好意外。


今年全馬、半馬同10公里，名額合共有7.2萬，較舊年多2000，其中全馬提供13,500個名額，半馬就有20,500個位。另外，繼舊年開設3公里輪椅賽，今年大會新加「半馬拉松輪椅賽」，傷殘人士可以一展身手。隨住報名人數愈嚟愈多，田總幾年前已經要將10公里賽搬到東區走廊，同半馬、全馬嘅參賽者分開，而且仲要安排參加者分組跑，今年同樣唔例外，開跑時間愈推愈早，但大家都無有怕一早起身參賽。


10公里賽下周報名

至於最受歡迎嘅10公里賽，3.8萬名額下星期接受報名，睇嚟到時又要爭崩頭。想喺東區走廊留低汗水嘅，可以去到馬拉松官方網頁（www.hkmarathon.com）報名。唔好話Emily長氣，點都要提一句，跑步最緊要量力而為，以免樂極生悲。