長毛為長津犧牲

【明報專訊】政務司長林鄭月娥突然出招，提出喺下周二加開財委會特別會議，審議長者生活津貼，以示尊重立法會周一再開公聽會，又可以滿足喺10月通過撥款嘅希望。議員係咪就咁收貨，相信到周二投票先至分曉，但呢個舉動就影響咗社民連梁國雄。長毛話，原本應承日本一間大學去講talk，但要留守立法會，睇怕應該去唔成。


長毛話，大阪一間大學邀請佢去做嘉賓，就釣魚島問題發表睇法，近期中日兩國就釣魚島搞到關係緊張，請長毛去講talk應該幾精彩。長毛話，原本打算呢個周日出發周三返港，點知政府突然加開財委會，令到佢一定要留喺香港。


大阪大學邀請講釣島

其實，長毛可以喺日本留少兩日，周二前趕返香港，佢話咁樣唔好，費事一來一回咁趕，但對於臨時缺席活動，感到唔好意思。