陳茂波圓財爺夢

【明報專訊】政府架構重組無期，陳茂波無得做副財政司長，「屈就」做低一級嘅發展局長，不過，下個禮拜佢終於可以一圓財爺夢，因為正印財爺下周外訪3日，其他可以替代嘅局長亦出埠，輪櫈仔終輪到茂波。呢期熱錢湧入，樓市股市風起雲湧，茂波可能暫時要忍一忍口戒酒，打醒十二分精神住個市。


政府公布，曾俊華會喺下星期一（29日）赴北京訪問3天，仲會去天津考察。陪曾俊華上京嘅有財經事務及庫務局長陳家強，同金融管理局總裁陳德霖。


呢期人民幣急升，熱錢流入，同京官會面，除咗會傾點樣喺香港發展人仔業務，當然離唔開近期熱門嘅經濟挑戰話題。財爺今次將拜會國務院港澳辦、商務部、財政部、銀監會、證監會、國務院國有資產監督管理委員會、中國保監、發改委同人民銀行嘅高層。


做住3日咁多

財爺出埠，按道理應該係陳家強署任，排落去就係商務及經濟發展局長蘇錦樑，但係下星期連蘇錦樑都有外訪，所以輪到茂波署任財政司長，做3日財爺咁多！

茂波做幾日司長，又唔使太擔心嘅，始終通訊方便，如果再有熱錢衝擊巿場，曾俊華同陳德霖喺北京打個電話落order就得。不過，都幾肯定茂波應該都係歷來民望最低嘅財爺，據港大民調，佢嘅支持率淨值（支持率減去反對率）係負35！