甘健成出殯蔡瀾葉澍堃扶靈

【明報專訊】鏞記董事總經理甘健成月初不幸猝逝，噚日朝早喺香港殯儀館大殮。甘先生生前廣結良朋，食家蔡瀾致悼辭時憶述，亡友生前最想環遊世界，但一直放唔低鏞記生意同班熟客，堅持日日返工，非常勤力。載住甘健成遺體嘅靈車，駛回鏞記門外讓一眾員工向老闆送別，當年佢父親甘穗煇出殯，靈車都有走過同一條路線。


鏞記員工門外送別

甘健成生前每日落鏞記舖面打點，招呼食客老饕，一批熟客包括前政務司長陳方安生、前經濟發展及勞工局長葉澍堃、食家唯靈同蔡瀾噚日都有到場送別舊友。與兄長一家打官司嘅二弟甘琨禮同三妹甘美玲，亦有出席弔唁。


大殮儀式之後，由蔡瀾、葉澍堃聯同6名鏞記員工扶靈出殯。靈車先駛經甘健成嘅跑馬地大宅，再駛至中環鏞記門外逗留約半分鐘，10幾個著住整齊制服嘅員工，企喺酒家門外送別老闆。靈車隨後前往柴灣歌連臣角火葬場，雖然老父甘穗煇係葬喺祖家澳門，但甘健成嘅骨灰將會安葬香港。