新聞類別
副刊
詳情#
【明報專訊】Kenny在港大修讀傳媒及文化研究，也是《拾年記﹕香港流行年代誌（2000-2010）》作者。他在沙田第一城長大，瀝源邨讀書，現在雖跟家人搬到火炭，但因教會、親戚朋友都在舊居附近，仍常回來。生長於斯，他也很同意沙田價值之說，「我父母也是那種很重高效率、少少精英主義的。」母校呂明才小學推國民教育，Kenny加入反國教，訪問了167名呂小家長，最多人「不支持但無奈接受」，達46%，撐罷課僅14%。「立會選舉，第一城最高票的是龐愛蘭、田北俊、湯家驊，居民價值取向好明顯。」
部分學生將問題全歸中港矛盾
最近Kenny負責帶沙田一間中學的中四生做社區研究，討論新城市、沙田人和鄉村三個主題，發現新一代與地區的關係彷彿割裂了，「唔覺得沙田是『我生活嘅地方』。我同佢哋講新城市以前有八佰伴、以前的消費文化，佢哋話無聽過，預備好的文章都無睇；佢哋97年出世，同年八佰伴結業。好啦，第二堂我畀奇夫篇文佢哋睇（《八月十五的沙田》刊登於2007年9月30日星期日副刊），有兩三個男仔，即刻圈住『殖民』、『米字旗』兩處，然後在旁寫『like』，真係激死，你又唔知殖民係咩，又無經歷過。佢就一本正經咁話，『我哋從一些人的口中得知殖民時期係好美好的。』後來我發現佢哋facebook都在share朗思的圖。講新城市點變，佢哋一下就跳到中港矛盾，好憎中國人，你同佢講領匯點蹂躪啲屋邨舖佢無感覺、講地產霸權都又無感覺，佢好似好關心社會，但咁嘅方式關心，我寧願佢哋似我同輩同學咁政治冷感，都好過呢種。」
回應 (0)
