區會補選5爭1 田少撐民記

【明報專訊】沙田區議會鞍泰選區補選會喺嚟緊嘅星期日投票，踏入最後階段，各候選人都出盡力拉票。一個區選補選就吸引5人報名，當中民主黨游月華同新民主同盟陳珮明屬民主派，而民建聯就希望新人招文亮可以拎番原本屬該黨楊祥利個位。雖然楊祥利因為財務問題辭職，但最近亦有幫招文亮出宣傳，呼籲街坊支持。


不過，Emily估唔到喺立法會選舉中內鬥得好勁嘅建制派，今次都算團結，連自由黨榮譽主席田北俊都有為民記拉票，招文亮最近就喺區內擺出同田少合照嘅易拉架，希望爭取更多街坊支持。


泛民陳珮明勤力 游月華多星

至於新民主同盟嘅陳珮明，就以勤力見稱，Emily聽聞有當區居民朝早返工見佢拉票，到夜晚接近1點又見陳珮明仲喺度同街坊握手，呢種密密做嘅方法，相信街坊都幾受落。


民主黨游月華就玩星級策略，該黨唔少立法會議員、領導層都不時落去拉票，好似日前胡志偉落去嗌咪，又宣傳吓佢嘅單車友善政策。至於前主席何俊仁，近排更多次去到鞍泰區，Emily有朋友住喺嗰區，話近期已經同何俊仁握過3次手！至於馬尼拉人質事件中死者謝廷駿嘅兄長謝志堅，亦都支持游月華，呼籲街坊支持。


同區參選嘅仲有蘇達良同陳國強。