認捐寶蓮寺一條柱288萬

【明報專訊】佛門乃清靜地，但銅錢味都唔細。大嶼山寶蓮禪寺呢幾年搞擴建，一直呼籲善眾捐款，原來家佛寺籌款模式都好現代化，學足大學咁，推出一大堆認捐同埋命名項目，由贊助一塊磚收200元，到捐一張「五方佛供桌」盛惠300萬元都有，真係豐儉由人。


寶蓮禪寺會喺12月24至31日辦天壇大佛開光周年紀念水陸息災法會，為籌建萬佛寶殿籌款。寶殿高5層，設有多功能廳、法堂、方丈室、禪堂同藏經樓等。寶殿喺2007年7月動工，工程已經封頂，預計明年中建成。


禪寺開出咗捐助項目名單，贊助一塊磚200元、刻名紀念收1000元、供奉小佛像一尊要1萬元、贊助法堂小龍柱38萬元以上，如果要贊助普賢菩薩等外牆石刻就要捐250萬元以上，仲列明石刻高147吋、闊140吋，明碼實價。再貴一級有贊助寶殿裏面條金柱，僅此一條盛惠288萬元。不過用嚟供放五方佛嘅供桌仲珍貴，要300萬元。想捐款同埋了解法會詳情，可以去禪寺網站www.plm.org.hk睇吓。