CY遷禮賓府 唔使睇風水

【明報專訊】特首梁振英（CY）上任至今快4個月，終於入住禮賓府，佢同太太唐青儀噚日已正式遷入，連裝修未完都唔等。睇番通勝，噚日係農曆9月15，都宜移徙、掃舍、上樑、安門、作灶，算係搬屋吉日，但據知CY唔係好理呢啲嘢，大宅擺設應該都無請教過風水師。


梁爸爸曾駐守 CY可懷緬童年

CY呢次搬屋只係經政府新聞處發新聞稿簡單交代，其實，禮賓府仲裝修緊，工程12月至完成，咁急不及待搬入去，可能係CY對禮賓府有特別感情。佢之前講過，當禮賓府仲係前港督府嘅時候，當差嘅梁爸爸就曾經駐守過；佢仲話，細個時爸爸帶過佢入去港督府玩，摘桑葉養蠶蟲，所以好想返去睇吓爸爸負責嘅警崗。CY呢幾日已經喺禮賓府出出入入搞搬屋事宜，Emily都想知道，佢去咗警崗緬懷未。


禮賓府翻新 盛惠995萬

有別於上手主人曾蔭權嘅又搵風水師又養錦鯉，CY暫時都未有咩大搞作，但早講過會保留錦鯉池。禮賓府係有超過150年歷史嘅古蹟建築，今次換主人順便裝修，港府就話，30幾年前即1979年換過屋頂瓦片，但因為漏水，所以今次全部再換瓦片；翻新工程7月展開，工程要花995萬元。


至於CY一家入住嘅地方，都要做一啲內部改建工程，又使咗490萬，政府就話已經「按照審慎和保守原則」裝修，但呢個價錢，都應該夠喺市區買到一層樓。