劉兆佳出書學識中文打字

【明報專訊】前中央政策組首席顧問、中大社會學系榮休講座教授劉兆佳，今年7月離開政府之後推出新著作，講香港回歸15年以來政府管治同新政權建設。

用普通話拼音輸入法

佳叔噚日喺尖沙嘴出席新書《回歸十五年以來 香港特區管治及新政權建設》發布會，原來佳叔都有自我增值，活到老學到老，佢話今次寫呢本書，由頭到尾都係佢逐隻字打出嚟，令佢學識咗中文打字咁話。佢話自己係用普通話拼音輸入法，仲出動埋Google等網上搜尋器查普通話拼音！

佳叔話，新書唔係回憶錄，講到明新書無料爆，只係以第三者身分，客觀分析香港回歸後政治形勢。佢話，回歸後本地無咩著作剖析香港政治變遷，佢離開政府時，已打算撰寫學術性書同文章。

佳叔當然不忘發布會推銷佢本新書，佢話，新書涉獵社會、經濟、政治範疇，涵蓋面之廣，市面上無幾多本書比得上，又話今次寫呢本新書，係以建設新政權做切入點，坊間無乜人會用呢個角度做分析咁話。