鍾樹根fb錯完可以再錯

【明報專訊】貴為立法會議員嘅鍾樹根，可能唔太習慣區議會外嘅新環境同新轉變，繼上次印卡片將「中華人民共和國」嘅英文版寫做「香港人民共和國」，佢喺facebook嘅「工作」介紹一欄，噚日畀人發現將「立法會」寫錯為「主法會」，即使之後改正，點知又誤將所屬地點標咗喺澳門，簡直好似去咗另一個「平行時空」。網民一日之內不但搵出佢嘅四大錯處，網民一日之內不但搵出佢四大錯處，仲幫佢整張新卡片派街坊。

鍾樹根錯印卡片後，已經成為網民心中「港獨之父」，噚日Emily入去鍾議員個人網頁，打算了解呢名立會新丁，發現再有詭異之處。首先，「工作」一欄唔「立法會」，而係不知名「主法會」。之後大約一個鐘頭內，呢個欄目改番做「立法會」，但地點就移師去「澳門」。即使之後再改正，佢就變「立法會議員」內議員。

指網站管理員手民之誤

網站一改再改，先至修正為「香港立法會」。一眾網民比Emily更仔細留意鍾議員動向，佢fb發現一篇載於10月18日有關反國教動議文章，大字標題寫住「葉建源議員『焚書坑孺』的動議！」。

眼利網民一睇就發現，佢係話坑殺「婦孺」，而唔係「焚書坑儒」。於是成班網民就幫佢整張全新卡片，印埋澳門特區區旗，發揮二次創作精神。

鍾樹根噚日回應Emily時話，有網站管理員幫佢處理資料，只不過係「手民之誤」，不足為怪，只要改番就得啦。