張炳良開鏞記飯局

【明報專訊】立法會審議長者生活津貼撥款搞到一鑊泡，唔同局嘅局長呢排亦開始日日約政黨傾偈。運輸及房屋局長張炳良噚日去信立會，話約房屋事務委員會嘅委員食飯。上次發展局長陳茂波約食飯，已有唔少議員都「唔得閒」，唔知今次張炳良嘅飯局，又會唔會易約啲。


中信大廈海都已經係議員飯堂，上次阿Paul個飯局就喺嗰度搞，不過，其實唔少議員都同Emily講，已經食到悶，今次張炳良就玩玩新意思，請議員稍移玉步去中環富豪飯堂之一嘅鏞記。近排鏞記新聞唔少，但係張局長仍然支持。


特首梁振英下月9日去立法會同議員食飯，立法會秘書處噚日邀請議員食完飯同特首影大合照。


唔知激進派議員賞唔賞面？Emily就好期待社民連梁國雄到時有乜新意思，相信佢唔會官仔骨骨著西裝同CY合照啩！