胡定旭：畀啲時間CY

【明報專訊】被視為前特首曾蔭權智囊嘅智經研究中心，一直由胡定旭任主席，但原來佢已經喺9月中辭去主席一職。到底係唔係因為特首梁振英（CY）上場之後「一朝天子一朝臣」，被視為唐營嘅肥胡同埋智經都要齊齊淡出政治舞台？肥胡噚日出席香港總商會論壇之後同Emily講，智經唔會有任何變化，運作同以前完全一樣。


智經運作「以前一樣」

至於智經會唔會向CY出謀獻策，肥胡話，智經每項研究都會提交畀政府參考，以後都會繼續咁做。佢話，因為部分政策研究涉及嘅題目比較長遠，所以近一年少咗研究出台。至於肥胡點睇CY上任後民望低迷呢？佢話，政府剛上任，需要時間磨合，佢又讚政府已經好勤力做嘢，希望大家畀啲時間CY咁話。


另外，肥胡贊成政府推出嘅兩招穩定樓市措施，仲話近幾個月樓價確實升得太厲害。至於新措施係咪過重，佢話唔同人有唔同意見，又話如果樓價繼續上升，對營商環境影響好大。肥胡認為新措施短期內會有效控制樓市，不過最重要都係要就土地供應進行長遠規劃。