財金三巨頭 原來同年同月同日生

【明報專訊】如果問金管局總裁陳德霖、證監會新鮮出爐主席唐家成，同埋證監會非執行董事李金鴻有咩共通點，相信大家第一個答案會係「都係男人」，再諗多一個，就係財金界名人，同埋都係監管機構做嘢，不過原來佢哋3名男士，就有一個天大的共通點，就係同年同月同日生！

同是58歲 同是昨日牛一

唐家成噚日牛一，芳齡58歲佢就爆料話自己同局長，同埋李金鴻齊齊生日，朝早仲互相祝賀。唔通呢個時辰八字利做財金監管？唐主席又好風騷咁話，佢個女夜晚會同佢慶祝，生日禮物方面就唔預有咩驚喜，因為呢位爹事先張揚話想要襪同埋睡衣喎！

唐家成爆料 歐達禮太太婦科名醫

講開唐家成個女，今年底就會做媽咪，將會榮升外公唐家成再爆料，話證監會行政總裁歐達禮太座係杏林界非常有名婦科醫生，咁小琴問佢，唐家成個女有否幫襯歐達禮太座，唐家成笑笑口話「咁貴！負擔唔起！」

意猶未盡唐主席仲要加多句，話仲有一個原因唔可以幫襯歐達禮太太，就係因為要避免「利益衝突」，佢仲繪影繪聲咁話如果歐達禮太座一邊拎住佢個孫條臍帶，一邊威脅佢加歐達禮人工，咁就弊喇！咁搞笑場景都畀唐家成諗到，佢身旁歐達禮就只有苦笑。