區詠芷被誤當已入政府

【明報專訊】盛傳會加入政府做環境局政治助理嘅區詠芷（Michelle），噚晚同地球之友嘅同事一齊出席香港環保廢料再造業總會嘅「2012年度會董會就職典禮」，但主辦單位好似已經當Michelle入咗政府，喺佢嘅名牌上寫咗「環境局副事務經理」。好在Michelle夠細心，即時指正，請工作人員寫過另一張，繼續用地球之友副環境事務經理嘅身分出席宴會。


變「環境局副事務經理」

Emily噚晚最初收到料，聽到話Michelle已加入環境局都嚇咗一跳，但即時覺得有問題，因為環境局根本就無「副事務經理」一職，相信都係工作人員搞錯。


Emily搵Michelle求證，佢話一見到個牌寫錯職銜，已即時換過一張，掛喺心口嗰個名牌嘅資料係啱嘅。