梁美芬名正言順講鼠患

【明報專訊】手握7票嘅經濟民生聯盟（經民聯）成立唔夠1個月，噚日就公布佢哋唔同政策嘅分工同發言人，不時代表經民聯回應記者提問嘅林健鋒，因為入咗行政會議，所以經民聯分工上就完全無佢個名，經民聯主席梁君彥話，林健鋒可能要代表行會，未必方便喎。至於經民聯內唯一嘅直選議員梁美芬，獲分配處理食物安全同環境衛生，唔知係咪方便佢繼續講老鼠問題呢？


被稱為「鼠王芬」嘅梁美芬就話，自己做直選議員，所以都好關注環境衛生問題，例如鼠患、蚊患、水質污染。正當梁美芬只係負責兩個類似範疇嘅發言人時，作為新人嘅工程界盧偉國就負責房屋、交通等多達6個範疇。


石禮謙做司法發言人

雖然梁美芬係法律博士，但今次分工，司法及法律事務發言人就由石禮謙做，莫非擔心梁美芬太惹火會講多錯多？梁君彥就解釋，梁美芬擔任立會該事務委員會主席，身分未必適合做發言人喎，仲聲稱石禮謙正喺城大攻讀法律，所以都有一定認識。經民聯其餘兩人為張華峯及劉皇發。