張華峯選舉只花3.5萬

【明報專訊】立法會候選人近日開始向選舉事務處申報選舉開支，Emily發現，當選做金融服務界議員嘅張華峯，原來只係花咗3.5萬元咁多，相反，落選嘅鄧予立卻用咗12.5萬元，足足多兩倍幾，證明選舉開支多寡係同當選機會冇必然關係嘅。


金融服務界只得596個選民，所需花嘅錢未必好多，有9172個選民嘅工程界就唔同玩法喇。同樣贏咗選舉嘅工程界盧偉國使咗27萬元，單係賣廣告已用咗10幾萬元。不過，佢嘅團隊都算識得慳錢，事關佢哋識得喺「淘寶網」淘咗50件競選用嘅tee同40支接力棒，相信喺香港買一定貴好多，呢啲接力棒應該係拍宣傳片用過，用跑步接力比喻議席要交棒畀佢。


醫學界退選人埋單40萬

而講到最弔詭嘅都莫過於曾經表示參選、喺最後一刻又退選嘅醫學界潘德鄰。雖然佢最終冇選，但原來佢早於4月已有參選意向，頻頻同業界醫生食飯聯誼，仲花近15萬元請公關，最後埋單盛惠40多萬元。潘醫生當時解釋，退選係因為未能及時放棄居英權，否認係被勸退或被揭黑材料。如果真係因為咁而選唔到，呢個代價真係幾大！