微博瘋傳潘石屹有私生女

【明報專訊】呢幾日內地班地產大佬真係熱鬧，先係萬科董事長王石畀網友爆料已經離婚仲另結新歡，而且有埋佢同新歡一齊坐飛機嘅相。原本地產界因為呢件事已經炒到㷫烚烚，點知兩日未夠，輪到SOHO中國（0410）董事長潘石屹「中槍」，畀人響微博話佢唔止有情婦，仲生咗個已經7歲嘅私生女。噚日取代王石成為話題男主角潘石屹雖然表面上冇就傳言有咩回應，但其實佢已經透過微博內部投訴對方人身攻擊，而SOHO中國亦都話公司未有任何回應，要由董事長去處理。

話說爆料潘石屹有私生女人叫做杜芝富，據講係一間湖北地產商老闆，佢仲公開埋潘石屹情婦姓名。


潘在微博指對方人身攻擊
而呢段消息被大量轉載之後，情節更變得愈愈豐富，有話潘石屹老婆張欣早已經知道件事，仲成功擊退「小三」；又話潘石屹好朋友，另一地產大佬任志強出馬勸潘浪子回頭。
不過咁，任志強好快就澄清話佢從來唔會干涉朋友私事，仲暗示係有人造謠；亦有網友話，其實係杜芝富同個所謂「潘石屹情婦」有合同糾紛，所以先會拖潘石屹落水。但係睇件事並未因為任志強澄清同潘石屹投訴而平息，因為杜芝富響微博講明仲有更多料要爆。

曾調侃王石識討女士歡心
講開又講，響王石畀人爆出有新女朋友陣，潘總曾經調侃王石會整紅燒肉博新歡歡心，點知話口未完自己立即成為被調侃對象，相信佢都始料不及。

email:piano@mingpao.com