現實版叮噹翻譯糕——「天下同音」

【明報專訊】細細個嗰陣好鍾意睇叮噹（家叫番多啦A夢真係唔多慣），入面法寶多多，真係唔少細路都好想要番件。咁多樣嘢入面，小琴最鍾意嘅其中一樣法寶就係「翻譯糕」喇，事關食咗之後，咩文都唔使識，照同啲外國人傾到偈。


不過，勢估唔到現實生活竟然有類似嘅嘢，噚日同做電訊同IT嘅金利通（8256）主席洪集懷食飯，佢介紹咗公司件新產品「天下同音」。


母語講電話 對方聽到外語

顧名思義當你打電話畀外國人嗰陣，可以用番自己個母語講嘢，而個系統會自動幫你翻譯同講番出嚟。換言之你講中文，對方就聽到英文，但係家只係得普通話、英文、日文同法文，廣東話就未有住。


小琴試玩過覺得都幾得意，但係附近一定唔可以太嘈，講嘢又唔可以太快，否則個系統會認唔到，同埋會有少少延遲。


不過，呢種技術家總算係正式推出市場，個系統分為坐枱電話同埋「Inatalk」App（應用程式）兩個版本，電話就賣約457元，每個月要畀約225元。App係免費下載，因為仲係測試版，所以唔收錢住。