田北辰要求用英文開會

【明報專訊】特首梁振英（CY）噚日首次出席新一屆立法會嘅答問大會，議員當然爭住發問，或者係第一次有機會提問，大部分議員都好關注業界或所屬範圍嘅議題，例如工程界盧偉國問基建，紡織及製衣界鍾國斌就問製衣，至於做過語文教育及研究常務委員會主席嘅新民黨田北辰就關注英文問題，包括要求政府會議要用英文開會，搞到CY都忍唔住笑。


稱助提升港人英語水平

田北辰話，雖然唔少港人去到日本、韓國等地方，都聽唔明當地人講嘅英文，但最近有報告指出，香港嘅英語測試排名喺亞洲排名第7，已經被日、韓爬頭。佢話，咁對香港競爭力好大威脅，要求梁振英提升香港英語水平，包括喺政府內部、甚至行政會議開會，都應該用英文咁話。


聽到田北辰咁樣講，梁振英笑笑口咁話，其實喺政府內部，用英文嘅次數相當多，佢覺得政府內部嘅英文無退步，但都認同要提升港人嘅兩文三語能力。見到梁振英同田北辰喺度咁講，英文唔錯嘅立法會主席曾鈺成就搭嘴，話開行政會議時公眾係聽唔到嘅，煲呔做特首時就曾經建議，立法會某啲特定會議用英文，但佢無接納。


CY﹕政府內部英文無退步

立法會內，其實未必所有議員都英文好，民協馮檢基提問時，就唔小心將數碼廣播電台嘅簡稱DBC講成DBS。DBS其實可以係好多團體或公司嘅簡寫，例如星展銀行或者拔萃男書院。唔知阿基講緊DBS時，會有幾多人理解，其實佢係講DBC呢？